Nach tuusige km Luft- und Landweg chömemer a eusem mit Abstand gröschte Ziel a, China. Crashed ine mindestens 3'500 Jahr alti Kultur ohni genau z wüsse was eus erwartet. Verständigung nahezue unmöglich, Schrifte entziffere sowieso. Die Einzige wenn überhaupt wo Englisch verstönd sind jungi Hostel Mitarbeiter. Bi ältere Kaliber kei Chance! Wo immer me isch verblüffti und neugierigi Blick.
Internet isch bekannterwiis zensiert, so au euse Blogzugriff. Nacheme informative Gspröch miteme Taiwanes hämer aber au das Problem miteme praktische und vude chinesische Regierig sicher nöd tolerierte Programm chöne löse.
Mir treffed als ersts in Kunming a, de Hauptstadt vude Provinz Yunnan ganz im Südweste. Eini vude villne chinesische Mega-Städt, mit über 3 Millione Iwohner. Es isch farbig, lüchtend und luut. Uf de Strasse tummled sich Fuessgänger und Elektroroller, gehupe isch allgegewärtig. S "Hump Hostel", womer icheckt händ, lieht anere Top Lag, Esse isch super, Ping Pong & Billard gratis und Terasse isch eifach de Hammer!
Ein Tag schnappemer de öffentlich Bus und fahred mite Beate us Öschtriich zum ei Stund entfernte "Stoneforest", es idrücklichs Naturwunder und Tourimagnet, wo eus fascht 6 Stund imene riesige Areal umherirre laht.
Abschlüssend zu euse erschte Erfahrige in China chömer säge, dases reisetechnisch no nie so schwierig gsi isch, d Chinese jedoch punkto Hilfsbereitschaft und Fründlichkeit ganz klar Pole-Position iinehmed.. :D
1 Kommentar:
Hey ihr zwei.... gseht hammer us!!!! wunderschöni natur!!!!
nur woni die arme tier gseh han, bini scho churz de träne nöch gsi....
oh ich vernisse eu!!! v.a. dich betty min schatz!!!! freu mi aso scho wenn ihr wider da sind!! aber gnüsseds no und mached wiiterhin so schöni bilder :)))
kuuuuuuss ni
Kommentar veröffentlichen