Nach Lijang hämer eusi Rucksäck umpackt und sind 2 Stund Busfahrt nördlich ufen abentüürliche Trek i die beiidruckend Tiger-Sprung-Schlucht, wo eini vude tüüfschte überhaupt isch und nachere Legende en Tiger uf de Flucht voremene Jäger mit zwei Sprüng übere Felsinsle uf die ander Siite vum riissende Fluss gumpet isch. De erschti Tag isch elend astrengend gsi da fascht permanent berguuf. Übernachtet hämer denn inere Abstiigi namens "Half Way", was distanzmässig ungefähr anechunnt. De nägsti Tag isches denn lockerer zuegange mit öpe 5 Stund Wanderig. S Highlight aber isch am dritte Tag de Abstiig i die steil Schlucht selber zum Tigerfelse gsi, wo mer übere schmali Hängebrugg ereicht händ. Die unbändig Chraft vude Wassermasse hät sich sogar spürbar ufem riisige Felse gmacht.
Das ganze Erlebnis isch denn no krönt worde duren heftige Felssturz ade Bergstrass, wo es wiitercho unmögli gmacht und eus zwunge hät, e wiiteri Nacht bide Schlucht z bliibe.. :)
Keine Kommentare:
Kommentar veröffentlichen