Die längscht Fahrt vu eim Ort zum nägste bis jetzt hät eus vu Chengdu nach Yangshuo ide Provinz Guangxi gführt. Im Schlafzug simmer 26 Stündli dur Land und Stadt gratteret. I dem hämer glatti Chinese kenneglernt, 18 jährigi Schüler, wo s erscht Mal ällei so wiit vu dihei weg sind, e 56 jährigi Dame wo sich pensioniere la hät und jetzt du ihres Land reist. Und de Michael, en 26 jährige Freigeist, wo d Schnauze voll hät vum Leistigsdruck wonem d Eltere ufsetzed und sini Gitarre gschnappt hät, um in Yangshuo mit Kumpels en Neustart z wage. Det wimmlets vu Touriste. Und natürli vu Restis und Bars woner chönnt Arbet finde. Das isch in China anschiinend meh als nur schwierig, au mit gutem Abschluss. Das wunderet eim aber au nöd, wemer a die viel Konkurrenz denkt.
Es wunderet eim au nöd das die Chliistadt vu so villne Lüüt bsuecht wird, sie hät richtig Charme. Umgeh vunere mayestetische Karstlandschaft mit sine typische steile Berge passt si wie es Postchartebild uf China. Die Gegend hät sonen hoche Stellewert im Land das sie sogar uf de gegewärtige 20 Yuan Note verewigt isch.
Mir sind also locker chli durs Zentrum gschlenderet, händ mit eusne neue Fründe gässe und gfiiret, sind mitem Floss langsam de Fluss durab und händ inere Höhli es erquickends Schlammbad gno :)
