Finale Mamallapuram

Letschti Station uf dere Reis isch s chline farbige Städtli Mamallapuram ade Ostküste südlich vu Chennai. S Meer isch rau und es gaht en permanente Wind. Agnehm chühl so nach villne Wuche schwitze. 

I dem Ort chame berühmti Felsrelief aluege, eis ghört zu de gröschte vude Welt. Imposant vorallem aber die Tempelalage und Tierabbilder, wo all us eim einzige massive Fels useghaue worde sind. 

Die Handwerkskunst hät sich bis hüt erhalte und mer chan da diversi Schmuckstückli us Stei erwerbe. 

20 Kilometer nördlich simer no e beidruckendi Krokodilfarm go aluege mit hunderte vu dene Viecher und am allerletschte Tag denn uf Auroville, wo mer au die wundersame Black Stones gfunde händ :)

Es isch es mega spannends Jahr gsi mit unvergessliche Erlebnis und lehrende Erfahrige. Aber jetzt isch Ziit cho wo d Heimat rüeft und mir folged mit Freude! :)

Bis glii..

Uncharted Hampi

Im tüüfe südliche Zentralindie simer ufes Dorf amene gemächliche Fluss gstosse wo umgeh isch vonere wunderliche Landschaft. Millione vu grosse seltsame Stei, verstreut kilometerwiit wie wenns irgendwenn emal vum Himmel gheit wäred.

Das münd au ferni Vorfahre vo hütige Bewohner damals glaubt ha, wos ihri Lager ufgschlage und ihri heilige Tempelalage da ane baut händ.

Nachdem mer s Dorf samt östrichischem Zuezug go bsueche sind, hämer eus nach es paar Täg erhole denn parat gmacht für e gföhrlichi Expedition wiit is karge und unerforschte Gebiet vude mysteriöse und wunderschöne Felsformatione rund um d Ruine vude verlorene Stadt :)

Gfunde hämer e absolut beidruckendi Natur und es riisigs Potential für allerlei Abentüür :)