Die Panda-Stadt Chengdu

Ändli simer nach gebirgige Landschafte und abgschiedene Plätzli wiedermal inere 10millione Stadt acho, Chengdu. Für eusi Visaverlängerig simmer zwunge gsie 8Täg da zwarte, was üs am Afang zimli gstressd hät, sich jedoch als glücklichi Wändig usegstellt hät da mir doch s eint oder ander unerwartete Highlight da entdeckt händ. :) 

Am erschte Tag hämer en Usflug zumene grossläufige Panda-Forschigszentrum gmacht und üs a dene süässe tabsige Baby-Pandas erfreut :) Die Region isch bekannt für ihres Pandavorkomme, die meiste vude wild lebende sind da ide Provinz Sichuan dihei. Die restliche verteiled sich i zwei agrenzendi Provinze. Es git schätzigwiis no ungefähr 1'500 Exemplar.

Bim surfe hämer spöter entdeckt das in Chengdu voreme Monät s brandneue Global Center sini Tore ufgmacht hät und dases s gröschte freistehende Gebäude vude Welt söll si! Das müemer natürli gseh also ab underground id Metro und womer nach 7 Statione und ca 20min wieder uftaucht sind.. Krass! Stäge ufe und denn staht eim de Chlotz vor de Nase wo usgseht wienen gstrandete Supertanker.. voll grössewahnsinnig! Das macht sich au drin bemerkbar.. Absolut platzverschwenderisch iigrichtet, da e Iislaufbahn, obe mal es IMAX Kino, de Siite entlang biz Shopping und Futter, ide Mitti en Fun Wasserpark. Aha. Also am nägste Tag namal mit Badhose und Bikini, yihaaa! :D 

..und als Belohnig Pizza bim Italo :)

Normalerwiis simer so ungefähr eimal pro Tag um de Egge zu dere Chinesin und ihrer Familie, wo paar Chühler stönd mit Spiess aller Art. Nach Uuswahl werded die denn imene Hexechessel miteme scharfe Gebräu garet und am Schluss ine Schüssle gschmisse und das heisst denn Hotpot. Megabillig und Hammerfein! Ebefalls händ die dämpfte, lecker gfüllte Teigbölle zu eusem tägliche Menuplan ghört.

Und öpe 2 Stund Busfahrt südlich häts namal en Rekord z bestuune geh: di weltgröscht usem Felse ghaueni Buddhastatue wos git. De isch echt imposant winer so sit wiit über 1'000 Jahr det hockt und uf die gegeüberliegende Berge lueget. Er isch im Jahr 713 under de Leitug vume chinesische Mönch agfange worde und hät 90 Jahr duuret biser fertig gsi isch. Sini Uufgab isch s beruhige vum wilde Fluss gsi, woner mitem viele usegschlagene Material wos im Fluss entsorgt händ au ereicht hät :)

Abgseh vo all dem hämer eus imene super chillige Hostel igmietet, mit friedlichem Innehof und schneller Internetleitig. Det hämer eus immer wieder zwüschetdure es lauschigs plätzli gsuecht und es paar bier gleert, knüpft, glese oder eis zwei film abe gströmeret ;D