Ja Varanasi isch sicherlich en Hard-Core iistig für Indie gsi, nach em ruhige, natürliche Nepal. Chum hämer Gränze passiert hät sich sganze Bild veräneret, meh Lärm, meh Dräck, meh Chüä, meh Lüüt, vo allem meh!
Es isch eini vo de älteste Städt in Indie und dezue ane au no eini vo de Heiligste... In Varanasi befindet sich sheilige Füür, vom höchste Gott Shiva entfacht als sini Frau Parvati gstorbe isch. Das Füür brännt angeblich sit 3000 Jahr und wird behüätet winen Staats-Schatz. Us ganz Indie pilgeret dlüüt da ane zum sterbe und sich aschlüssend bi eim vo 3 burning Gaths verbränne zlah... Dhindus glaubet drah, das wämer sich durch dFlamme vom heilige Füür verbränne lat, diräkt in Himmel chunt und nüm wiedergebore wird (wie das ja im Buddhistische und Hindu-Glaube isch).
Jede Morge und Abig gits am Ganges diversi Ritual, jede Tag, me gspüürt i dere Stadt en ernorme Glaube. Was de Manu am eigene Leib erfahre hät, me häten im Tempel bim heilige Füür zunere Zeremonie iglade, leider nur für Männer :(
S Bild vo de berrüähmte Stägene am Ganges isch üs verwährt blibe, extremi Hochwasser händ fast all vo de hunderte vo stäge ignoh... Das hinderet dInder natürli nöd drah, ihri morgentlich Reinigung durezfüähre.
1 Kommentar:
hehe das ritual bi de stege bade hani mal im fernseh bime doku gseh ;o) isch doch das mega dreckige wasser und für die es mega ding?
Kommentar veröffentlichen