Am Fuäss vum Himalaya

Nachdem mer in Pokhara acho sind und es paar Täg mit fuulenze und bade im See verbracht händ, hämer eus uf de Weg gmacht is Annapurna-Gebiet, wo zum nepalesische Himalayagebirge ghört. Es git mehreri Bergspitze mit dem Name, de Annapurna 1 isch über 8'000  Meter hoch und es git unterschiedlichi Treks bis zu 21 Täg lang, wo bis zu sim Base Camp führed und e Top Kondition und Uusrüschtig erfordered. Mir händ eus füren gmütliche 4-Tagestrek bis uf ca 3'500 Meter entschiede. Und de hät eus über endlosi Steistäge, dur verschlafeni Bergdörfer, verwunscheni Wälder, über klapprigi Hängebrugge, glasklare Flüss, zu fründliche Gastfamilie und a neugierige Affebande verbii gführt. De Ussichtspunkt Poon Hill, womer am morge früh am dritte Tag erklomme händ, isch zwar wege Wulche ussichtslos blibe, hät eus defür aber dur die iisig chalt Temperatur wach für de neu Tag grüttlet :)
Defür simer am nägste Morge mitemene klare Himmel belohnt worde und händ doch no en beidruckende Blick ufs höchste Gebirge vude Welt erhascht :)

De ganz Trek hät eus denn zum Schluss doch zimli müedi Bei beschehrt und mer sind froh gsi womer de Jeep gseh händ, wo eus zrugg uf Pokhara bracht hät. Die vier Täg sind ganz klar eis vude schönste und suuberste  Naturerlebnis uf eusere ganze Reis gsi :):)